灣仔街頭，碰到公務員T，此君在官場二十幾年，未夠鐘退休，亦冇乜機會升到做阿頭，最好就係久唔久攞吓假，同老婆大人呢處去，嗰度去。問佢：「減薪咯噃，有冇唔開心？」公務員T話：「預咗啦，冇所謂啫，你減得會多過我。」佢都算有良心，知道我哋面對嘅減薪壓力更大。再問佢：「減唔夠四點七五喎，財爺落唔到台。」公務員T話：「阿松哥唔多得我哋鍾意，冇謂講，總之佢傷害咗我哋感情，減薪就減薪啦，我明白㗎，使乜啲語氣講到我哋係財赤之源啫。」
佢話松哥以商人身份加入在公務員行列，作風過猛，以後「我哋大家躺死不幹，事事跟足程序辦，問佢點頂！」譬如話本土經濟，松哥叫民政事務專員統籌，以後有乜嘢壓落嚟，一於要松哥孭晒飛。公務員T話：「假如我係消防處（舉例啫，請勿誤會或對號入座），有人要搞特色熟食店，民政事務專員同我打招呼，我就會寫一封公函，列明各項消防安全條件，要申請人做足，但加多一句：「為推動本土經濟着想，增進就業，促進旅遊，上述安全條件，似可酌情通融，請專員定奪，我們自當從命。死未？」嘩，咁又幾絕。假若民政事務專員夠膽批示照辦嘅話，萬一發生火警，搞出人命，佢點孭呀，唔敢定奪嘅話，各部門繼續打拉布，松哥啲本土經濟大計（即係特首第二任嘅施政重點之一）點樣推行呀？睇嚟松哥更有排煩。