噚日國足隊喺濟州中文球隊早操，有位瀋陽球迷王龍君竟喺場外聲討米路天奴域，呢位仁兄話米路曾應承過送張世盃波飛畀佢，但後來冇咗件事；佢重將國內曾報道呢單嘢嘅報紙畀人睇，話好彩經另外途徑得到「中巴大戰」門票，但米路冇信用就唔可以原諒喎。不過，米路點解無端端會送飛畀佢就冇講到，事件嘅真相就認真耐人尋味。
上仗對哥斯達黎加勇戰受傷嘅孫繼海，噚日終於可以出番球場，不過因腳傷未愈，只坐喺場邊睇隊友練習。唔知孫大俠係咪睇見各位隊友積極操練而一時技癢，最後都唔理傷勢，同另一位無份踢分隊賽嘅門將區楚良一齊玩控球鬥多比賽，睇嚟牙骱賽大過天。
西歸浦近幾日嘅天氣變得炎熱，氣溫高達攝氏三十幾度，一班國足操練期間，都不停飲水消暑止渴。而國足嘅管理層亦好識做，除了帶備大量飲品到操練球場，同時亦預備每名球員一包冰，畀各人解熱及治療肌肉疲勞等問題。