靜咗一排，呢輪又開始多蝦賣，而且連一向比較少量嘅九蝦都有，我肥師奶都立即買咗啲回家煮。九蝦個樣好易認，蝦頭係黃色嘅，而個體形則同中蝦差不多大小。
九蝦由於數量較少，所以一向價錢都貴少少，但可能係經濟差咗，𠵱家都只係賣$48/斤，比以前要賣差唔多$58/斤時平咗好多。佢肉質鮮甜，點煮都可以。
約$48/斤
各大魚檔有售
野生海石蚌由於較少見，所以價錢都幾貴，分分鐘要成幾百蚊先至買到一條。我肥師奶就唔捨得食咁貴嘅魚。不過好彩石蚌都有養魚，雖然質素比唔上野生貨色，但以養魚計都算質素唔錯嘅一種。
而且以前連養魚都要六十幾蚊斤，𠵱家就四十零蚊斤，平咗好多。蒸石蚌時記住要將魚膏放魚背上一齊蒸，先至食到魚嘅甘香。
約$38/斤
各大魚檔有售