港股微跌，老牌紅籌華創（291）同中信泰富（267），仍然去緊，分別上升3格同5格。
中信收17.65元，升25仙，昨日所提嘅Call輪9160同9037，分別只係爬高0.5仙同1仙，未有跟貼正股。中信有啲有心人護盤，個勢未盡，同上月中最高位18.45元比較重有好大距離，而華創則同上次高位比較則只係相差好少，中信上升空間大過華創，揀輪要揀中信Call輪。
經過近日變化之後，中信Call輪9160好抵買，9月下旬到期，有3個幾月玩，現價32仙，溢價只係0.4%，槓桿率有成5.5倍。9160嘅吸引力，喺9037之上。
恒指最高曾升73點，收市跌21點。恒指Call輪9045平水咁滯，槓桿率超過10倍，對恒指變化非常敏感，恒指110點上落，其輪隨時升跌10%。
個市未玩完，9045買得過，重有7個禮拜至埋單，溢價1%，槓桿率10.9倍。個市短期睇上多過睇落，9045揸得過。恒指另外有隻Call輪9174，交投冇9045咁多，炒呢件不如炒9045。
章 盛