過往組裝機（俗稱黃金嘜）同牌子機市場對象不盡同；一個以低價升級易為賣點，一個就外形吸引兼有售後服務，兩者向來河水不犯井水，不過近來兩者開始作出變化，其中香港土炮A-Lab就推出一部平價桌面電腦，賣相重打破一貫砌機唔夠靚嘅傳統㖭。
記者、攝影：徐影龍
處理器：Celeron1.3A
記憶體：256MB
硬碟：40GB
顯示卡：Savage43Ddisplay
光碟機：三星48×CD-ROM
擴充插槽：FireWire、USB
附加功能：TV-Out、Ethernet
體積：270（D）×190（H）×160（W）mm
呢部名為絕「細」好機，由香港品牌A-Lab設計，最吸引人地方肯定係其四四方方嘅機身，不但採用全金屬物料做外殼，而且機前面板加咗一層藍色透明膠片，遇着燈光會有一種發出淡淡藍光嘅感覺，可謂極之搶眼。除賣相可取，四四方方嘅機身十足十Panasonic出嘅GAMECUBE兼容機Q咁，雖然並非正立方體，不過由於設計重點針對喺纖巧方面，故此擺放位置較靈活，就算放喺電腦枱上都唔覺阻地方，最啱地方唔大嘅家居或擺喺睡房嘅用家。
由於P4處理器已陸繼減價，加上新P4上場，令到一啲較低檔嘅處理器都隨之而減價，直接減低整套電腦嘅成本，亦因為咁，絕「細」好機配備Celeron1.3A賣價都可低於四千蚊，不論用家想趁暑假學電腦，又或喺屋企開多一部伺服器都算抵玩。
其他配件方面，主記憶體有256MBSDRAM，應付WindowsXP及一眾常用軟件表現算穩定。硬碟容量為40GB，除安裝作業系統、軟件及Game外，可配合機背嘅FireWire插頭玩埋DVEditing，相信仍有足夠空間剪輯極大容量嘅DV影片。值得一提係機背設有TV-Out輸出，重係S-Video同Composite兩種，唔駁芒駁電視打機睇碟都咁盞。
可能有啲讀者好鍾意個型仔機箱，可惜機能方面唔多滿足，又唔可以單獨齋買個機箱返屋企自己砌機，咁嘅情形最好就係按喜好將機件升級。既然絕「細」好機為黃金嘜機種，喺硬件升級更換方面都好Easy，只需扭開機背三粒螺絲就可打開機箱，完全唔使用螺絲批。打開後可見到各樣配件都排放得井井有條，自行升級硬件要注意硬件位置、接線走位唔好亂等。機內空間有限，故只提供一條PCISlot供用家插上各式配接卡用，不過底板已有齊各式應用功能，相信加入配接卡機會不大。
要注意係跟機不設任何作業程式，筆者建議出機時，用優惠價一併購買原裝WindowsXP家用版，可選擇中或英文版本，價錢約$800，比一般零售版差不多平一半。
抵讚：以價錢嚟計，賣相及機能已算抵玩，自行升級硬件亦具砌機特色。
要彈：機箱內空間不多，擺放位置須兼顧散熱問題。
查詢電話：28910371