世界盃熱潮愈嚟愈高漲，食肆同酒吧不時迫滿人，商戶生意大增。長實響北京東方廣場商場「東方新天地」，最近新增「東方啤酒花園」現場播放世界盃賽事，當然吸引唔少球迷幫襯（圖）。睇嚟唔理邊度，總之大業主或商戶搞同世界盃有關嘅活動，都大收旺場。
土瓜灣傲雲峰內購反應一般，長實今日公布新按揭計劃，唔知可唔可以扭轉銷情呢？
新盤多重優惠促銷，昨日九建先帶行家參觀元朗采茵軒示範單位，再去上水馬會會所做訪問，其間路過信和早前以投地方式購入的雙魚河項目，記者發覺項目相當多樹，相信另一「環保項目」即將誕生。
講開信和，今日亦以世界盃為題，介紹睇波熱點。該公司的奧運站奧海城商場北門一部大電視，成為球迷熱點，每次有重要賽事，有成千人聚集，又多一睇波奇景。
新地旗下啟勝物業管理，開始進軍內地物業管理市場，啱啱承接咗第一個非新地發展嘅管理合約，就係上海世紀亞太盛滙商場，聽講管理合約重會陸續有來。該集團董事陳錦輝透露，舊年開始已同上海其他發展商傾談管理合約，另北京亦有一個項目，樓面有150萬方米。
政府前日公布重售居屋，傳媒自然大篇幅報道，本報將各主要發展商嘅意見列出，等讀者易於閱讀，而南豐發展嘅意見都好有份量，但一般人只係識得佢嘅主席陳廷驊，所以本報選用佢老人家嘅相片作為公司代表，不過，有關意見就係佢夥計張華清嘅。
蘭西