當你有機會響路上，遇見有疾馳中嘅MiniCooper的話，切勿輕言向佢挑釁噃！皆因當中至Top擁有163匹馬力輸出，以及0至100公里7.4秒加速力嘅CooperS小跑車，右軚版新車經已正式運抵香港喇！但由於到港嘅數目好有限，暫時全港都不出五部咋！究竟呢部小跑王有幾正？我哋不如一齊嚟先睹為快啦！
記者：陳偉林 攝影：陳偉強
ImageGirl：Norris
若然你係Mini嘅Fans的話，大抵都不用多說，惟呢部頂級嘅CooperS，包裝卻好有個人風格，除頭冚有顯眼嘅大型生風入口外，兩台白色門邊鏡、鑲有S字樣嘅方向燈、車尾中置雙出式排氣喉，以及香港版特有嘅四輪17吋LeMans合金胎軨組合，都好有號召力㗎！
1.銀白框邊嘅頭燈，配襯起獨立指揮燈同霧燈布局，好有神氣。
2.頭冚正中央加有扁長生風入口，以增強引擎嘅吸納量。
3.頭輪拱兩旁置有S徽號方向燈配襯，倍見突出。
4.跑車化嘅合金油箱蓋，予人有跑意盎然之感。
5.直立式尾燈旁刻有CooperS字樣，身份盡現。
6.中置雙出式尾喉設計，每有雄渾咆哮聲響，令人動容。
7.兩邊門鏡襯以白色點綴，較普通版更見突出。
講到車廂鋪排，除卻雙色真皮椅同雙天窗配搭，有一定吸引力外，由於香港版嘅CooperS，刪減咗原有電子導航儀嘅關係，故軚盤前方只置有引擎轉數表，而中央控制台頂端，則改置有大型車速計連多個警示燈號，都好有特色㗎！設備除電窗、電鏡及中央門鎖外，少不了重有原廠恒溫冷氣同高級音響組合，當然亦有不可或缺嘅雙安全氣袋啦！
身形短小精悍嘅CooperS，想唔到底盤係取材自寶馬3系，予人有穩紮嘅可靠感外，四輪跑車化懸掛設計，匹配上電子牽引及循迹裝置（ASC+T），重有四輪碟式制動，以及ABS連EBD裝置，均令這台1.6公升直4DOHC機械增壓引擎，發揮得無後顧之憂。
優點：愈見吸引嘅新款Mini，重拾昔日迷你谷巴嘅風采，而呢部跑車版嘅MiniCooperS，驚人嘅爆炸力更教人怦然心動。
缺點：具Mini特色嘅座椅編排，卻少欠一份靠攏嘅妥貼乘坐感，而四輪懸掛亦見偏柔一點。