美國前日爆冷贏咗葡萄牙三比二，爆咗今屆世界盃其中一場最大嘅冷門，但係佢哋總統喬治布殊竟然喺幾粒鐘之後先知自己國家隊喺世界盃揚威，而啲美國人亦冇因此而上街慶祝。
葡萄牙假假哋都係奪標熱門之一，隊中重有應屆世界足球先生費高壓陣，所以美國贏到佢哋，都咪話唔巴閉。但係美國人對於自己隊波可以喺世界盃贏強隊，似乎冇乜感覺；反而住喺美國波士頓嘅愛爾蘭人，見到隊波迫和德國，就興奮到上街慶祝。另外，美國總統喬治布殊都係好遲先知道戰果，所以佢當然冇送上賀電。可想而知英式足球喺美國係幾咁唔掂呢。
美國近年雖然努力推廣英式足球，但係當知道籃球、棒球同埋美式足球先至係佢哋最鍾意嘅球類時，就會明白點解佢哋會對英式足球咁不聞不問。
效力羅馬嘅巴西中場艾馬臣早前喺練習時串演龍門受傷，搞到連世界盃都無得踢。呢件事令到羅馬教練卡比路扯晒火，鬧巴西教練史高拉利黐線，無理由容許個主將亂咁嚟，都咪話卡比路無道理。史高拉利就賴得理，重鬧番卡比路轉頭，話關佢鬼事。
英格蘭萬人迷中場碧咸同太太「辣妹」維多莉亞恩愛，就係人都知，估唔到佢哋重好癡纏。「辣妹」話喺英格蘭到咗日、韓後，每日都會同老公講十次電話，為佢打氣。我求大俠就覺得「辣妹」成日咁煩住碧咸，佢點樣專心備戰呀？
塞內加爾隊波係就係好波，但係球員就冇乜球品。好似佢哋個中場戴奧咁，夠膽喺球證面前一腳踢落丹麥後衞軒歷臣上五吋下五吋，唔俾球證趕出場就有假。其實佢哋班波質素唔差，如果喺踢法上可以收斂話，應該可以好似尼日利亞同喀麥隆一