「落機呀」最新機王8910已於日前上市，挾着首部支援藍芽嘅手機，同時間未有相對配件於市場出售，可算失敗。不過呢個世界物件就死嘅，人腦先係生㗎嘛，好多兄弟已經力推友廠「愛記」隻藍芽耳機嘞！除咗唔支援聲控功能之外，家陣都未有發現乜嘢大問題，希望「落機呀」爭氣些少啦。
講開呢部新貴，入電方式確係敗筆，真係手指粗啲都開唔到，重有呀，王子發現咗樣嘢，唔知係咪市道唔好呢，好多水貨舖行家定價都唔係好高，反而有啲連鎖店夠膽死標成$6,980，重冇得免息分期，好可能國內啲表叔認為貴先係原廠正貨啦！咁都畀佢去到貨，怪就只怪水貨舖手機場平時唔多老實啦，抵死！