印象中西班牙人至愛蒲通頂，晏晝就有全民午睡Siesta，最忙係跟狂牛拚命，生活悠閒自在，真係恨死隔籬！西班牙人既然咁識享受人生，在飲食這個大題目方面，一定鑽研得很深很深，的確，西班牙菜最愛以海鮮作主導，不似法國菜一碟菜淋三幾款醬汁，賣相亦勝意大利粗菜，選擇當然多過葡菜，因此Tapas、Sangria、Paella成功流傳世界各地。咁巴閉，一於從頭至尾徹底吃個明白。
記者：楊一凡
攝影：伍慶泉
Paella源自西班牙魚米之鄉瓦倫西亞，其精采之處是原隻大蝦、青口及肥蜆在無遮無掩，躺在黃澄澄的米粒之上，任你魚肉。由於海鮮在飯粒未熟時已加入飯內，加上湯齊齊煮，飯粒煮至五成熟，即海鮮精華完全滲入飯粒之中，所以海鮮均是全熟，而半熟的飯粒為添咬勁。
試味報告：紅花粉的香氣瀰漫在空氣當中，切粒的三文魚和魷魚，平均分布在金黃的飯粒之間，啖啖鮮甜。
扁平的西班牙火腿捲埋都無拳頭咁大，但價錢是兩張紅衫魚！這款國寶級火腿矜貴在選料及製作時間，小肥豬的血統有一半是野豬，一半是家豬；出生後用上等飼料Acercorns餵大，靚豬一經入選，便要花上兩年半時間醃製及風乾。吃火腿不用刀叉，學西班牙人，一手抓一口𡁻。
試味報告：色澤火紅油潤的火腿非常鹹，最啱送酒，火腿並非煙熏，只是風乾，肉質煙韌，每塊火腿也帶點脂肪，這部份最矜貴，千萬別撕走。
煮熟後的帶子還黏着貝殼，新鮮得很，每隻帶子都裝有自己的醬汁，頭一款是欖油、百里香加油醋；第二款是酸忌廉加洋葱碎；第三款是混合火腿碎、洋葱、蒜茸、鹽和胡椒，冚到實一實，幾似中式鹽焗雞。
試味報告：有欖油那款最清甜；酸忌廉較油滑；鹽焗那款出奇惹味，但千萬別一口把小鹽山吃下肚，給帶子伴適量便可。
鱈魚白雪雪，睇見都鮮甜啦，誰知一食，彷彿是霉香鹹魚上身，菜牌上只寫CodFish點解咁鬼鹹？老闆輕鬆地說：「鱈魚在當地已醃好，到港時已勁入味。」鹽些少就不覺腥，所以配料亦加有酸甜的橙及清淡的蔬菜去中和味道。
試味報告：一啖夾雜沙律菜、橄欖、香橙和鹹鱈魚的沙律，原來幾好味，因為其他配料分薄了鱈魚的鹹味。
魷魚仔本身夠鮮嫩甜美，加入招牌醬汁一煮，最後灒些少白酒，香遍四周。招牌醬汁的材料是甚麼？廚師頑皮地笑笑說：「秘方點講得㗎！」大笑幾聲後卻又說：「都係離不開新鮮的蒜茸、番茄、紫蘇葉、香草、芫荽、橄欖油和調味料。」哦，秘密係新鮮。
試味報告：魷魚仔很爽甜，因為剛熟，不覺韌，招牌醬汁酸甜香辣，每種味道都有齊，幾妙。
原來焦糖布甸一直雄踞甜品榜榜首，須知食店是西班牙人駐港聚腳地，何解一道簡單布甸有力征服國民。其實西班牙人喜歡簡約，加有橙味甜酒的布甸又甜又滑，誰都一吃鍾情。
試味報告：滑過山水豆腐的焦糖布甸，一點也不油膩，香滑得一入口已自動「Sir」落肚。
大廚Mrs.LilachDi在西班牙著名的烹飪學校EscuelaDeHosteleriaDeSegovia學煮餸達十年之久，其後在西班牙多間出名的餐廳出任廚師，如馬德里的Amparo、瓦倫西亞的CasaChiva以及巴塞隆拿的LaPlaza，六年間煮盡不少西班牙東西南北菜式。
西班牙像個渾身是勁的漢子，其悠久的歷史文化、高貴的皇室制度、拚死的鬥牛活動，盡顯動感之國的魅力，其實西班牙是歐洲藝術的發源地，無論是文藝、音樂、服裝、建築及繪畫等，都帶着強烈的民族色彩。
老闆CarmeloLopez說香港人常把Tapas理解成點心，其實很錯，你看香港酒樓也不會在晚飯時段賣點心，這點西班牙人都一樣。
Tapas一字在西班牙語解作覆蓋，因最早出現的Tapas是一片蓋着雪梨酒杯口的火腿。Tapas是佐酒小吃，酒才是主角，吃Tapas讓胃部有嘢打底，不易飲醉。
Tapas是放在櫃枱的透明小廚櫃裏，讓你點選配酒，酒味較濃的可揀西班牙辣肉腸，清淡的酒可配蛋奄列或蒜茸甜椒，點配其實都係悉隨尊便，其他較常見的還有炸魷魚、油浸橄欖等。
店名：OleSpanishRestaurant&WineBar
電話：25238624
地址：中環雪廠街24至30號順豪大廈一樓
座位：70個
營業時間：星期一至六中午12時至下午3時，晚上6時半至11時半。星期日休息。
付款方法：現金及信用卡（A.E.,Diners,JCB,Master,Visa）