噚晚英國駐港總領事館搞酒會，慶祝英女皇登基金禧之喜。酒會人頭湧湧，阿董、煲呔、陳太、誠哥和大SIR等都有捧場。幾乎數得出嘅部長熱門人選亦喺度，包括陳南祿、潘宗光、梁愛詩、葉澍堃、曾俊華等。阿松啱啱喺美國表咗態話肯做部長，八方梗係唔放過機會，追問佢哋會唔會學阿松咁表態。
葉澍堃話：「阿松點同吖！我又唔係阿松！」雖然笑容燦爛，但就封嘴。潘宗光則話：「畀我保留啲私隱啦！」有位政府新聞處顧問一見國泰航空常務總裁陳南祿就叫佢「陳部長」，陳南祿即刻叫八方「你引述話係佢講㗎！」錢果豐就話覺得陳坤耀對經濟政策嘅理解好符合經濟原則，會係一個好人選。楊官都有到場，但就話自己「老嘞」，唔使諗。
講番前事頭婆登基五十周年，阿董回憶當年自己只有十五歲，重未有衞星轉播呢回事，只見周街都有慶祝登基活動，所以重記得。唱英國國歌時，佢同八方話重記得啲音點唱。
（圖）陳南祿（右）畀人叫「陳部長」時笑而不語。
傳真︰2623-9278
電郵︰