恒指升89點，滙豐（005）升25仙，恒生（011）叻啲，升1元，收87.25元。大摩以流通量計算指數成份股，恒生上禮拜俾人掟到暈，𠵱家呢個影響過咗氣，基金再由基本因素揀股。
恒生再度受到抬捧，點解？因落後過滙豐好多，同埋息高。恒指股中最高息係中電（002），第二就係恒生。中電波動細，唔係個個基金啱，就算攬咗貨都係慢慢升，唔似得恒生咁彈彈跳。
恒生往績計，有5.6厘息，今年估計接近6厘，啲錢冇出路，唔好話基金，就算紅簿仔存戶，都覺得抵過擺錢收息好多。
恒生有得睇，要揀恒生Call輪，最佳對象係9143。又話高息股啲Call輪唔值得揸？9143喺8月到期之時，正股都未派中期息，唔使理高息因素。另外，啲數據又真係好靚，槓桿率去到13.8倍，兩個月命，溢價1.9%，即係每個月得1%唔夠。呢件係正嘢，唔係「九死一生」，咪走雞。
中信泰富（267）整固後再升，收17.40元，進帳20仙。中信兩隻Call輪9160同9037要上車，兩隻輪溢價唔夠2%，槓桿率5倍以上，諗得過。
章 盛