由中國外經貿部屬下中國海外經濟合作總公司開發嘅東莞浪琴花園，第二期奧斯汀堡，除提供零首期，八成30年樓按優惠外，推廣期首20買家可獲額外97折及免所有雜費，𠵱家參加6月睇樓團，重有得去摘荔枝，詳情就要問中原。
上個月多個新盤輪住賣，唔少代理都受惠，「荷包」豬籠入水，聽講利嘉閣5月份錄得3120萬元佣金收入，不但比4月的2730萬元多14%，好似重係舊年1月以來新高，值得恭喜。雖然話新盤市場暢旺，不過，首5間逾100萬元佣金分行，4間都集中做二手，包括駿景園、沙田中心、跑馬地成和道及赤柱分行。而利嘉閣因為新界區做得唔錯，所以新界區董事陳大偉自掏腰包，攞咗3萬蚊響太古廣場采蝶軒請近100同事食飯慰勞。（圖）
至於中原5月份有8個營業組別做到超過100萬佣金收入，其中九龍塘森麻實道分行以175.7萬元居首，其次為大埔康樂園分行，佣金逾140萬元。
長實同九鐵合作嘅紅磡國際都會服務式住宅都會軒，申請緊預售書，發展商表示好快會賣，佢哋話可吸引到一批公司同個人投資者、單身貴族及高層上班夫婦一族入市。
太陽島教育機構最近租咗西環卑路乍街56號地下至3樓作分校，上址地下300呎，1至3樓各2550呎，總面積7950呎，月租7.08萬元，租期3年加2年，免租期3個月。
蘭西