中環風流韻事陸續有來，今期《東周刊》又影到Baby李國寶同Peggy廖碧欣上周三晚一齊去玩，《東周》記者話見到佢哋凌晨一點幾，手拖手離開鏞記大廈嘅私人會所KeeClub，當時Peggy着件緊身小背心，寶Baby就面紅紅，好似飲過酒。佢哋見到記者，就跳上的士絕塵而去。據KeeClub職員講，兩人唔係第一次去嗰個會所玩，只係記者影唔到。
自從呢段「李廖緋聞」曝光，中環有良好紀錄者人人自危，聲稱慘過白色恐怖，視狗仔隊如仇人。八方聽人講，話有人甚至因此連部長亦唔做，就係怕豔聞被揚，其實使唔使咁驚呀？克林頓都冇事啦！
銀行界老友話，佢記得以前有單貸款，係兩家人嘅銀行借畀澳門一間酒店，有關法律文件好似就係Peggy間律師樓做，唔知係咪咁而造就一段友誼。證券界老友則搭嘴，話上次睇完《東周刊》之後，飛身入市買重廖創興銀行嘅股票，點知隻股上到八個三就止步，成個五月重係咁跌。問佢點解咁睇好，佢話炒廖銀同東亞合併喎。
對於阿Baby又俾傳媒影到佢同廖碧欣嘅合照，一向言論抵死絕核嘅鄧永鏘，噚日喺萬寶龍頒獎禮上，又再發表佢嘅高見，佢話：「計我話，佢哋係唔想俾人影唔到就真，嗰度咁多記者，一個係牛津畢業嘅律師，一個係劍橋畢業嘅banker，IQ加埋幾千分呀，我邏輯分析過，佢哋當時一定知有記者在場嘅，不過愛情係冇邏輯嘅，外間有壓力重好，自己鍾意做乜咪做乜囉，咁樣先至愛得自由吖嘛。」
傳真︰2623-9278
電郵︰