明日世界盃大戰，阿根廷對英格蘭，萬眾矚目，左丁山忍唔住要講兩句。阿英大戰因為福克蘭戰爭、馬納當拿上帝之手以及上屆碧咸被趕出場而添加無限幻想色彩，豈止一場球賽咁簡單！每場阿英大戰都包含國家仇恨，民族情緒，足球爭霸，球星之間嘅妒忌、呷醋，正係包羅萬有，一定刺激萬分。今次賽事重會加上新元素，就係踢曼聯踢到一口烏氣，俾堅尼窒過嘅華朗，誓要在英國觀眾面前一顯威風，證明自己有料到。堅尼呢匹臭馬，已經冇得玩，被愛爾蘭人鄙棄，碧咸對瑞典之役，充份表現出狀態未恢復，左腳唔敢踢波，未足以踢足全場，聽日如果踢得好過華朗，簡直係奇迹。
英格蘭呢隊波，對瑞典攻不銳，守不穩，全場冇一次有組織性嘅突破攻門，冇咗碧咸供應，奧雲簡直無所施其技，成條中場線崩潰，於是後防打到慌失失，好難頂得住阿根廷嘅圍攻，唯一嘅方法就係死守求活，希望打贏尼日利亞，得五分出線。以左丁山嘅愚見，艾歷臣應該出修夫基（夠老定）配費迪南，蘇金寶在前面攔截死跟巴迪斯圖達，中場四個人，碧咸、史高斯、夏格里維斯（死纏華朗）、畢特，前鋒只出一個奧雲打突擊，呢個四．四一陣式，或者可以為英格蘭搶番一分，如果對攻，實俾阿根廷㩒住砌到扁為止。艾歷臣聰明絕頂，知道限米煮限飯，相信唔會再以希斯基打左中場咁笨咯。