小賭原來不僅可以怡情，還有助改善勞資關係。在世界盃風潮席捲下，一間廣告公司的老闆就與員工打成一片，齊齊賭波，當然有人贏錢兼贏「牙骹」，但也有白領麗人一鋪輸清成份糧，只好繼續乖乖為老闆打工。
這家位於九龍的廣告公司規模不大，只有十多名員工，但上下一心對世界盃都帶着一股狂熱，雖然公司沒有安裝有線電視，但每當球賽開波，老闆就開大收音機，讓所有員工聽現場直播。
老闆杜先生說：「公司嘅同事平日都會賭吓馬仔，政府未禁止境外投注賭波時，有同事重會賭埋波。但政府真係唔識做，偏偏喺世界盃之前通過嚴禁賭波，搞到班同事心癢癢。見到班同事無心機，自己都好唔安樂，所以咪開工時畀同事聽吓現場直播，起碼知道最新賽果。」
秘書Sally，是公司有名的「賭后」，不但鍾意賭馬，也愛賭波。她是全公司第一個開設澳門賭波公司電話投注戶口之人，部份同事加入賭波行列都受她影響。她的同事透露，Sally在今次世界盃期間，就曾經一場波投注一萬元，但結果不幸清袋。
Sally否認自己豪賭，但不諱言政府嚴禁賭波後，同事圍內會賭吓「牙骹戰」。她說：「大家都係賭餐茶，賭餐飯啫。」講到日前的中哥大戰，Sally就一肚氣，她說：「大家一早就唔睇好中國隊，預料對巴西隊個場，相信最少會輸三球。」
記者：林社炳