港股噚日本來極之淡靜，不過港府突然間話有嘢宣布，即刻有春江鴨入市掃地產股，令大市回升。原來煲呔曾宣布重售居屋，本年度只售4900個，比原訂上限9000個為少。雖然政府強調會維持建居屋，但差不多已廢房委會武功咁滯，日後港府比較頭痛係如何向公眾解釋，點解每年要撥大量資源維持功能大減嘅房委會運作。唔好唔記得，政府需要削減開支呀！
i100（616）以先舊後新方式配股集資，1億股舊股由配售代理以盡力配售方式進行，結果配售代理真係出力配售。噚日此股復牌後，股價大跌29.1％，收報0.28元，成交股數有1.95億股，平均價為0.288元。
黑客話，配售代理應該已經完成配售行動，後市股價應該可以企番穩啲，不過經過今次配售後，貨源散晒，短期內難以歸邊，後市相信有排冇運行。
大陶精密（8041）供股計劃接獲1.42倍超額認購，但睇清楚，其實只有36％股東肯按比例認購，其他認購額主要來自額外認購。據聞額外認購主要來自有心人士，以今次供股情況嚟睇，相信有心人士已經達到增持目的，貨源從此歸邊，相信距離開車日期不遠矣。此股噚日上升4.7％，收報0.18元，成交304萬元，後市要突破0.20元相信唔難。
泛華科技（1105）噚日勁升18.6％，主要炒佢將有重大公布。據消息話，此股可能會配售新股。
阿 虎