洪欣同好友蔡少芬早前去咗法國一個禮拜旅行，洪欣話已經有成七、八年冇同蔡少芬一齊外遊。
洪欣噚日同馮仁昭傾電話，話當佢同蔡少芬喺法國玩得好開心時，不幸遇上小扒手，好彩蔡少芬手快，將個扒手捉住，洪欣至幸保不失。蔡少芬咁醒，洪欣重話：「嗰刻我覺得佢好英勇同好man，如果佢係男人，我真係會愛上佢。」
洪欣重話冇豔遇，但佢同蔡少芬經常手挽手行街，引嚟外國人用好奇怪嘅眼光望佢哋㖭！洪欣話：「我哋特登互摸大家塊面，好親熱咁，整蠱啲望我哋嘅人。」
英皇新人周英杰早排俾人傳佢追張栢芝，原來佢只係同栢芝約會過一次。馮仁昭聽啲朋友講，話周英杰有個朋友患上末期癌症，但佢係栢芝嘅fans，所以周英杰做好心，透過另一位朋友約栢芝一齊去見嗰位癌病fans，點知咁啱就俾人影咗相。周英杰幫人變咗無端端傳緋聞。
由十三至十九歲美國青少年投票嘅「TeenChoiceAwards2002」，日前公布提名名單，成龍主演嘅《火拼時速2》去年喺美國大受歡迎，令佢同拍檔基斯德加（ChrisTucker）一齊入圍角逐「最佳化學作用拍檔」獎。
韓國女歌手朴志胤喺港、台兩地都有唔少歌迷，人氣當然勁啦！最近服裝品牌Bossini就睇中佢，搵佢做香港同內地的廣告模特兒。
朴志胤除咗有好多廣告拍之外，據聞連英皇娛樂都想搵佢同旗下歌手陳冠希合作拍電影，而朴志胤所屬嘅事務所已經證實有呢件事，不過細節重傾緊，雙方合作嘅成數都幾高。
好姨薛家燕有份演出嘅無綫劇集《皆大歡喜》推出以來，大受歡迎，好姨噚日喺電視城向記者展示由新西蘭一位小男影迷寄嚟嘅卡通畫，嗰個小影迷重將《皆》劇演員卡通化，難怪好姨笑住咁話：「我哋（指《皆》劇演員）幾犀利，喺海外咁多地方都有人支持，遲啲九月我重會去美國登台十幾日搵真銀。」
蔡依林同經理人公司「大聲」持續九個幾月嘅合約官司，終於有結果，台灣仲裁庭判決蔡依林終止合約有效，不過就要賠九百萬新台幣（約二百萬港元）畀「大聲」，「大聲」就會撤回對佢嘅誹謗等刑事訴訟。不過「大聲」對蔡依林涉嫌觸犯錄音著作權嘅刑事官司，仍會維持訴訟。而蔡依林對自己回復自由身感覺輕鬆。
黃百鳴噚日去中環新城財經台接受訪問，佢話近排忙於同全國青少年工協會合作，下個月會喺廣州開戲劇師資培訓班，目前佢已經搵咗麥秋同李力持幫手，不過佢心目中最想搵吳宇森，因為可以講解做導演嘅心得。對於劉德華追討一千五百萬元酬勞一事，黃百鳴話冇留意呢件事，因為每間公司嘅政策唔同，佢唔方便畀意見。
近排有傳關淑怡多怪行，上個星期二有人見到關淑怡自己一個人，坐喺銅鑼灣嘅怡東酒店咖啡室沉思，嗰日佢足足坐咗成個晏晝，當有人經過佢身邊，佢就「睥」住人哋，好似好怕人哋認到佢咁，而且佢間唔中重會喃喃自語，所以啲人覺得佢有啲奇怪，都唔多敢同佢講嘢。