世界盃開鑼唔夠一個禮拜，趙飛雲就因為顧住睇波，唔集中精神睇市而受到教訓。
早幾日睇見有證券行推介新地（016），當時覺得有些少奇怪，點解會喺呢個時間推介地產股？但顧住同人講波經，就完全冇件事。此外，前日收到消息話東航（670）申請將外資持股量，由現時35%放寬至49%。當時覺得消息對東航股價有刺激，可以短炒一轉，但因為個心放喺中國隊對哥斯達黎加嗰場比賽，結果冇買到。
噚日午市突然傳出，出售居屋方面有利好安排，地產股帶動恒指升幅擴大，東航最後亦大升5%。政務司司長曾蔭權親自替重新出售居屋解畫，並大派定心丸，話今年9月重售居屋嘅未來1年，只售4900個，較市場預期每年9000個減少近半，另外又講明05/06年度之後，每年出售居屋唔超過2000個，以增加置業貸款名額代替。呢個安排，明顯有利地產股。
由於有新消息入市，恒指有本錢升破11400阻力，上試20日線（現處11616，每日約以20點下滑）阻力。因此修訂先前升至11400受阻沽恒指Put輪嘅策略，改為觀望恒指能否升破20日線，然後再出擊。
趙飛雲