到咗埼玉幾日，每次出去做嘢，因街道人多車多，點都要塞車，少則五分鐘，長則二十分鐘，但前晚去埼玉世界盃球場採訪日本對比利時場波，回程時交通非常順暢。
前日三點幾出發去埼玉球場，喺大宮轉火車，已覺得好多市民好趕忙，照計三點幾鐘未放工，原來係提早收工，趕返屋企，又或者約埋朋友一齊睇日本場波。
回程時大宮主要街道真係少咗好多人同車，連平時好多日本人去嘅波子機舖都係小貓三幾隻，可以肯定大部份市民都睇波。昨日公布嘅收視率有百分之六十五點八，幾乎打破六四年東京奧運會日本女排其中一場比賽的百分點之六十六點四嘅歷年來最高電視收視率。
講真，呢幾日接觸過唔少日本市民，覺得佢哋對足球認識唔算好深，當中有好大比例係捧偶像球星，不過，睇佢哋對日本隊的支持同投入程度真唔講得笑，有市民七點鐘已到球場等入場；又有市民請假睇波，部份公司更提早畀員工收工。
如果日本真係入到十六強，到時肯定進入瘋狂狀態。