南韓贏波爆無窮魔力

南韓終於打破宿命，首次喺世界盃決賽周贏波，球員嘅決心和表現認真抵讚，而南韓全國球迷支持嘅狂熱程度，搞到全國大小街道無晒人就完全反映出嚟。
昨晚喺光州世界盃運動場所見，無論係球場工作人員，又或者係守門口班警員，都一邊工作一邊睇波，就連的士司機都開着收音機聽波；喺返酒店途中就發現一個奇怪現象，大小街道統統死寂，比起早兩日特別少人，原來大部份人都留喺屋企或者食肆睇南韓喺釜山對波蘭場波，後來睇番電視新聞，先知呢個情況喺全南韓都出現。
有一則新聞重講平時最繁忙嘅高速公路，都因為呢場波而行車流量大減，暢通無阻。勢估唔到足球比賽對一個國家或者城市嘅影響力可以咁大。

「六‧四」有紀念價值
南韓打敗波蘭確係對當地國民好大鼓舞，電視新聞報道員都着起南韓波衫報新聞，超過半小時講晒南韓隊新聞，以及可否喺世盃再創驚世成就；成晚重複又重複播番兩個極富歷史意義嘅入球，「六‧四」從此成為南韓人值得紀念嘅日子。