唔好話我肥師奶淨係會買平嘢，有時我都會行吓高級超市，買啲有品味嘅食品。今次我就對呢隻外形高貴嘅Harrods礦泉水一見鍾情。呢隻水個樽做到同名貴酒品一樣，分有氣同無氣兩種口味。我肥師奶比較鍾意有氣嗰種，飲落特別啲。
$12.5/320毫升
$19.9/750毫升
金鐘太古廣場Great有售
早前唔多覺眼見到有好多瀨尿蝦賣，搞到我肥師奶啲仔女想食都無。不過呢排終於見到瀨尿蝦的數量又增多番，而且重要係肉比較多的那種長頸瀨尿蝦較多。不過𠵱家嘅瀨尿蝦體形都唔係好大隻，約莫四、五吋長左右。由於較細隻的關係，所以價錢唔係話好貴，三十零蚊都算食得過。
約$33/斤
各大魚檔有售
我肥師奶啲仔女最鍾意食豉油王雞髀，一隻都送到成碗飯，我就唔使餐餐都咁頭痛要煮甚麼菜式至合口味。用黃油雞髀味道會較香，雖然無白油雞髀咁容易上色，但價錢平好多，所以我都係買黃油雞髀。
$10/4隻
各大凍肉檔有售
我肥師奶開頭見到呢個廚具時，重以為佢係煙灰盅，跟住睇埋說明，先知原來我搞錯咗，呢個係用來煲湯時，將啲會黐底嘅材料墊高，唔使直接受熱。最適宜用來燜煮一啲要原件煮，又比較大的食物，例如滷水牛𦟌時用。而平時反轉都可以當碟仔用。
$10/個
銷售點：十蚊店
文：肥師奶
攝影：楊錦文