小初因為健諾（8031）輸錢而發愁，經紀陳叫小初留意做建築嘅盈信（015），佢話呢隻股升咗好多日，但噚日成交就特別強勁，據講好似想搞批股。盈信噚日升14.4％，收1.75元。由5月最低價1元炒上，累績升幅75％。
經紀陳話，隻股早在年頭時已經傳過想批股，但好似直到近期先至搵到人做。不過係人都知盈信貨源極度歸邊，今次咁樣急升法，完全係唔想外人參與嘅格局，到真係批股時，都唔知去邊度搵人接貨？
講起健諾，今次小初真係左一巴，右一巴。前日先沽貨輸錢走人，噚日則睇住佢升番上49.5仙收市，回升23.8％，雖然與招股價65仙仍有一段距離，但臨收市前，買盤係咁掃，睇到小初幾乎眼都凸埋。
經紀陳話，原來健諾有一批為數過億股，冇禁售期嘅舊股可以沽得，可能有人想收埋呢批貨先至炒上。但若然真係咁，小初就重㷫，你話有咩理由要搵捧場嘅小投資者嚟陪葬？
慕容小初