喇沙T來自名校喇沙，有碩士學位，轉數快，識投機，正是典型香港精英特點。日間從事學術工作，晚間網上搵真銀，最近啲周刊報道學生哥靠eBay月入過萬，就係佢嘅寫照。政府成日話推動知識型經濟，應該係指佢。
近排喇沙T又有搵銀諗頭：喺銅鑼灣賣日本雜誌。且聽佢解釋：「香港班𡃁仔睇日本雜誌已成習慣，淨係做佢哋生意已經穩陣，重未計OL客，萬幾蚊個手袋爭住搶，幾十蚊本日本名牌書點會慳？賣埋日本『景品』（抽獎玩具）又撈多筆。銅鑼灣最為人知嘅日本書屋只得兩檔，幕後其實係同一間公司嚟，企硬十一、二算做獨巿生意，幾年來唔憂做。只要喺附近開多間頂佢，做番正價六至八算肯定成功搶灘。香港有日本雜誌代理打開門做生意無任歡迎，打開黃頁就搵到聯絡，照價批七至八折，不過要簽半年約。呢場仗好易打！」喇沙T並非冇理，想當年太子聯合廣場有人加入賣六算雜誌，即刻引起減價戰，三十蚊本《StreetJack》𡃁仔買到笑哈哈，更搞到潮流特區嗰間勁賣玩具幫補。未知今次減價大戰銅鑼灣會否照樣上演？
主持人：大食Jack
八卦熱報：