張綺桐近日面對喪失親人之痛，她的祖母和胞弟先後逝世。張綺桐年約二十四歲的胞弟上月底疑因抵受不住失業的壓力燒炭自殺。在這件事發生後，張綺桐的人生觀亦改變不少，她希望大家要積極面對人生，不要做儍事。
張綺桐（桐桐）近日家中接連發生兩件不幸事件，她的祖母和胞弟都先後逝世，桐桐的祖母因肺癌過身，而其胞弟則在上月燒炭身亡。
面對兩位至親的離去，桐桐十分憂傷，她昨日在電話中說：「我對於兩位親人離開，真係好唔開心，呢個打擊好大。我都曾經有過一刻好傷心，怕自己撐唔落去，不過朋友都勸我要堅強啲。」
桐桐年約二十四歲的胞弟原本任職電腦程式員，近日因為經濟低迷及就業率差，懷疑受不住失業的打擊，上月底一時想不開在元朗寓所燒炭自殺。桐桐說：「細佬在生時好叻，性格好開朗，佢係一個充滿自信嘅人，唔知係咪因為近日工作唔如意，所以佢失意就諗唔開。話晒佢咁後生，真係好可惜。」
問桐桐事前可察覺胞弟有異樣，她說：「其實我哋自細感情好好，但佢咁突然了結自己生命，警方又冇搵到佢嘅遺書，佢哋話會再調查佢死前同朋友通嘅ICQ，睇吓有冇線索。」
桐桐表示，近日除了忙於照顧雙親外，還要為胞弟的後事張羅，她說：「我哋安排咗幫細佬火葬，遲啲先會攞番佢啲骨灰。」桐桐面對喪弟之痛，只希望借此帶出積極面對人生的正面訊息，她說：「𠵱家太多自殺新聞，我希望大家喺作出呢啲不智嘅決定之前，要諗吓佢哋走咗，留喺世上嘅屋企人會好大影響，家人會好傷心。呢件事之後，我嘅人生觀都變晒，我學會更關心同珍惜身邊嘅人。」
採訪：比華利