一向甚少特賣促銷的THEBODYSHOP，今次破天荒以特賣作招徠，場內共四萬多件的貨品，大部份以三折起的超優惠價益各位Fans，小記認為場內的貨品，以招牌化妝品最抵掃，再加上大支夾抵用的沐浴啫喱同潤膚露都以半價發售，絕對超值！
記者：區佩嫦
攝影：伍慶泉
ImageGirl：Marcella
THEBODYSHOP的LipGloss一向是熱賣貨品之一，可能好多女士們都好似小記咁貪方便，鍾意用有色的LipGloss，貪佢有色兼立立令。呢款LipGloss就最啱小記心水，佢嘅質感豐潤，顏色又夠實淨，搽上唇後覺得潤而唔乾，備有淺粉紅色、粉紅色及啡色三種選擇。
容量：4.5ml
貨量：50
原價：每支$78
超筍價：每支$28
另一款唇彩就啱晒鍾意食雪糕的女士們，事關佢帶有甜甜的呍呢拿或朱古力味，搽上唇的甜甜感覺，恍如食雪糕般夠晒好味。白色那支是帶透明感的呍呢拿味LipGloss；啡色則為朱古力味，淺啡色的唇彩能為你的櫻唇營造豐厚的感覺。此外，兩支均含SPF20的防曬指數，夏天陽光咁猛烈，用佢就最啱啦！
容量：7ml
貨量：1,400
原價：每支$45
超筍價：每支$20
上季推出的蠟筆形眼影，深受少女們歡迎，今次特賣以$35的筍價益大家。這款眼影勝在容易掌握，對於初哥嚟講輕輕一搽就已經好均勻，唔怕出現一撻撻的情況。另外，每盒有兩隻色，分別是粉紅色配紫色、淺啡色配墨綠色和粉紫色配灰色，全部都極易襯衫，唔知買邊隻色的話，不如唔好諗咁多一次過買齊三盒，可以慢慢用。
貨量：100
原價：$98
超筍價：$35
想面部更具立體感，呢支不論外形同質感都好似唇彩嘅啫喱閃棒就可以幫到你，只要搽在需要Highlight的額及鼻等位置，便可以為面部營造立體的效果，𠵱家$28就有一支，夠晒抵用。
容量：8ml
貨量：30
原價：$80
超筍價：$28
要香又要潤，呢支白麝香潤膚露係一個好選擇，佢含芝麻油、棕櫚油及白麝香成份，能紓緩及滋潤肌膚，肌膚自然變得幼滑動人！再加上淡淡的幽香，令你身心都可以得到紓緩的感覺。
容量：60ml
貨量：190
原價：$35
超筍價：$15
好多人都鍾意白麝香的清新味道，若然你亦是同道中人，相信你一定唔會錯過呢支白麝香香薰，其氣味清淡宜人，而且具持久力，早上噴完後夜晚都重嗅到淡淡的幽香味道，噴喺頸及手腕的脈搏位就整日都可以香噴噴啦！
容量：30ml
貨量：40
原價：$120
超筍價：$60
THEBODYSHOP的沐浴露一向都受歡迎，今次以一半的價錢就買到支最大Size的1000ml沐浴露，的確要講個「抵」字。呢支甜莓沐浴啫喱，含桑樹棗及綠茶精華，能潔淨及滋潤肌膚，綠茶精華更有抗氧化成份，讓你的肌膚回復幼嫩，而且甜甜的果香味，絕對是嗅覺的享受。
容量：1000ml
貨量：300
原價：$180
超筍價：$88
若果你同小記一樣，經常要周街行，呢支平足三百幾蚊嘅足部潤膚露，就一定成為你掃貨的頭號目標。呢支帶薄荷味的潤膚露，含有甜杏仁油、可可豆油、羊脂、薄荷等精華，能紓緩腿部的疲倦、消除腫脹及軟化腳部的硬皮，有咗佢足部都可以得到滋潤。
容量：1000ml
貨量：94
原價：$400
超筍價：$90
好似小記咁面油多到氾濫的你，不妨同小記一齊掃番支茶樹洗面液。呢支洗面液以極具殺菌功能的茶樹為賣點，能深層清潔肌膚、防止粉刺暗瘡產生，用後暗瘡粉刺重唔一齊同你講ByeBye！
容量：60ml
貨量：200
原價：$38
超筍價：$20
𠵱家嘅空氣污染指數真係日日創新高，污染除咗令呼吸系統唔多妥外，其實對皮膚都有一定傷害，呢支防禦性嘅面霜就專門對抗污染。佢含有海藻精華，能鎮靜肌膚，為肌膚補充水份的同時，又能對抗污染物對皮膚的傷害。備有潤面霜及SPF10的防曬面霜兩款。
防曬霜（左）
容量：50ml
貨量：30
原價：$190
超筍價：$95
潤面霜（右）
容量：50ml
貨量：365
原價：$168
超筍價：$85
呢樽潤唇霜，可以講得上係THEBODYSHOP嘅熱賣產品之一，潤唇霜的士多啤梨味夠晒香甜，其保濕效用亦唔差，能滋潤雙唇，令唇部變得幼嫩潤澤，𠵱家$15就有一樽，的確抵用。
容量：15ml
貨量：10
原價：$45
超筍價：$15
THEBODYSHOP二樓特賣場
日期：6月7日至6月9日
時間：10:00am-11:00pm
地址：尖沙嘴北京道14號永樂大廈地下（尖沙嘴地鐵站C1出口）
查詢電話：23678230