足球比賽同賽馬一樣，喺一場賽事入面，表演得好嘅一隊，到下次出賽時贏面會自然被秤高咗，連帶亞洲盤讓球亦會出現讓對手更多嘅情況，但係隊波究竟係咪夠班去讓人咁多呢？呢一點就值得大家喺選盤時先細心分析一下。
睇過晒決賽周分組賽首輪賽事，當中嘅塞內加爾、德國及南韓都有極佳嘅演出，如果好似賽馬嘅評分咁，佢哋到下一場比賽時自然會被莊家秤高咗；以南韓作為例子，佢哋下一場會對小組入面實力平平嘅美國，初步盤口已經由南韓讓平手/半球（決賽周前盤口），即刻去到讓半球，如果唔係葡萄牙唔爭氣，畀美國全取三分，睇嚟重可以去到讓半球/一球㖭。
當然，南韓首戰對波蘭時表現極之勇猛，球員體能佳加上主場威力，真係唔可以睇小。不過，大家試諗吓目前有邊啲球隊係可以讓美國讓到半球或更多呢？喀麥隆呢類非洲一線球隊，或者歐洲二線球隊如西班牙及瑞典都應該可以；而南韓始終係亞洲球隊，佢哋嘅實力又係唔係可以去到歐洲二線頭，或者非洲一線球隊嘅水平呢？
再睇多樣數據，國際足協嘅國家隊排名，南韓排第四十位，美國就排第十三位，係咪真係可以讓到咁多呢？呢場波如果臨場南韓就算只讓到平手/半球，我就寧願揀下盤，或者忍手唔玩嘞。
同波神傾開偈，佢有個理論我覺得真係幾啱，一隊波突然出現無故大勝或者大敗，下一場個盤路都好大機會會轉，當中道理就係同亞洲盤個讓球機制有關，亦脗合長路有盡時呢個定律。
文：華度