港股昨日跟隨美股大散一輪之後，護盤隊伍出動，恒指由最低位反彈107點，收市只係微跌47點。
投資者早段夠膽喺低位入市買Call輪嘅，有啲到收市之時已經有1分錢利潤落袋。
轉月份窩輪「縮水」現象繼續，例如長實（001）收71.50元，升50仙，但兩隻熱門Call輪9043同9063仍然下跌1仙。縮水情況應該好快告一段落，原因係啲溢價已經縮到差唔多。
長實Call輪9043同9063都可以諗吓，前者現價27仙，8月到期，溢價7.1%，槓桿率26.5倍。後者現價34仙，亦係8月到期，溢價5.7%，槓桿率21倍。前者勝在槓桿率大些少，後者勝在溢價低些少。
喺呢度耐唔中提吓嘅中電Call輪9171，又升7%，收36仙。中電（002）喺淡淡哋嘅市況中，逆市升40仙，收32.40元。
9171今年9月到期，負溢價1.3%，槓桿率9倍。
隻輪到期之前，中電唔會再有息派，有咁大嘅槓桿率，冇理由負溢價，結論係隻輪仍然重有得去。
章盛