美股周一大跌，港股噚日表現都算硬淨，早段最低之時只係跌155點，其後大部份時間在較高水平拉鋸，雖然埋單都係下跌，但都算高收，恒指守穩在11300水平，收報11312，僅跌47點，期指收報11310，輕微低水2點。
世界盃決賽周第一個高潮，中國首度登場，大戰哥斯達黎加，股票行老細好多都「網開一面」，直播賽事，人人掛住睇波，成交又再縮水，成個下晝做唔夠20億元，全日51億元，係近兩個月以來嘅最低紀錄。中國隊守得穩上半場，下半場就連失兩球。輸咗呢場，出線機會已大降。
噚日推介嘅中國製藥（1093），有基金盤在尾市趁勢壓價，低收1.27元，跌8仙，剛好完成旗形量度跌幅，正合低吸。另外，生命科技（1180）在跌市中借勢調整至0.33元，亦可趁低吸納，以0.29元止蝕作中線持有。
製衣股早輪急升後，近日由高位回落頗多，以同得仕（518）為例，近期高位2.625元，噚日收2.15元，已回落近兩成，再跌風險已不大，建議在2.0元至2.1元水平收集，以1年為期，目標2.8元。
同得仕2002年3月止年度的業績料月內公布。上半年度，由於美國經濟疲弱影響，營業額6.36億元，減少14.3%，獲利3178萬元，減少17.6%，每股盈利9仙，中期息5仙。
集團下半年度盈利通常較佳，今年首季美國經濟復甦，集團料會受惠，估計全年盈利約9200萬元，每股盈利26仙，派息15仙，往績PE8.2倍，息率約7厘。
同得仕已開始拓展北美洲以外的市場，其中以中國市場有理想表現，目前在各大城市經營的零售店已近60間，盈利可保持增長。至於北美洲市場復甦，將可帶動集團盈利重拾升軌，估計2003年3月止年度盈利可上升至1.1億元，每股盈利31仙，派息17仙，係賺價收息嘅理想對象。
郭兆誠