米路噚日終於如願帶到個傳譯入場幫手，唔使煩傳譯嘅問題；但開波後米路左騰右騰，喺場邊坐立不安，就知道國足形勢差，佢老人家煩緊啲乜啦？
唔知係咪哥國球迷未見過靚女，昨日喺開賽前佢哋喺球場外每逢見到中國或者南韓嘅靚女，就一個箭步走上前話要合照，係唔係博懵就唔知，但就好戥嗰啲靚女唔抵。
一班香港人三五成群遠道而來支持國足，同佢哋傾開香港份工會唔會受影響，佢哋話唔理得咁多，睇完波至算。大部份香港球迷都會跟足中國隊三場分組賽，喺𠵱家咁嘅市道，能夠咁做，認真「愛國」嘞！
信唔信「中哥戰」頭等飛只售港幣六十五蚊呢？但真係有其事，事緣部份中國球迷因臨時攞唔到簽證，一班攞住一大疊波飛嘅人惟有在開賽前半個鐘開始拋售，張張無花假嘅頭等飛，喺開賽前三個鐘重係值成千蚊㗎。