杜菇外貌有啲似龍眼，屬於熱帶水果之一，原產地馬來西亞、泰國、菲律賓等地，嚟港只有短短兩年多，今年比去年更抵食，每磅平均平咗$2。佢通常夏天至蒲頭，去年買過嚟試我已愛上佢，其食味比龍眼重要清甜，有股獨特清香味，果肉晶瑩通透，只要搣去外皮就食得，但不可不提大家，杜菇果皮有種黏液，好易搞到成手黐𣲷𣲷，搣嘅時候或者可以戴對手套，若沾到黏液都唔緊要，以我經驗，可以用食油抹淨後，再用梘液清洗就可以。
莧菜價錢平，營養高，含豐富鐵質、鈣質、維他命C等，經常食有補血功效，增加臉色紅潤感。所以我間唔中都會清炒莧菜食吓。前日到菜檔買莧菜，檔主竟介紹馬齒莧頭我試，話係今年至有得賣，重話用佢嚟煲湯唔單止清甜，飲咗重具清熱解毒、祛濕功效，於是買小量返去配以南北杏、蜜棗豬骨同煲，湯水幾清甜，而且啲仔女又出奇地鍾意飲，第日準備再買，檔主話一早已沽清，要買最好趁早喎！
文：肥師奶