八方日日喺呢個專欄度寫官場、政界及商界名人，好多時只寫佢哋嘅花名外號，唔少讀者會問，究竟講緊邊個呢？
當然，有啲花名已流傳甚廣，唔使再解釋，好似老懵董煲呔曾阿蟲詩姐姐四個官場最高層，讀者都明；至於「掃把頭」葉劉淑儀因髮型得以為名，任關佩英就因個性突出，「鐵蝴蝶」嘅外號早在廉記時代聞名。
最近高官之中，孫明揚就被班立法會成員起咗個新花名，叫做「孫霸」，皆因啲議員認為佢今次推高官問責制霸氣十足，乜都冇得傾，硬要七月一日上馬；噚日重笑佢喺個部門有排冇嘢做，但係又霸咗個常任秘書長。
至於俞小姐平日咁鬼硬朗率直，原來佢班同僚私下笑佢「愚忠」，係AO（政務官）嘅樣板人物。
另一個大內小總管黃灝玄就從來唔介意俾人叫「黃公公」；真正大總管林瑞麟「林D8」最近人氣迫人，佢啲同事都感到佢愈來愈威猛，索性叫佢做林D9，升咗一級，同司長平起平坐。
官場公子型人物唔少，好似葉澍堃同蕭公子，估唔到林煥光最近也上榜，綽號「小林公子」，又幾盞鬼。
傳真︰2623-9278
電郵︰