國際足協話到明唔會放過啲蓄意搞到對方被趕出場嘅球員，但係巴西球星李華度就明知故犯，結果咪搞到一身蟻囉。李華度承認土耳其安素嗰球波，只係省佢隻腳而唔係佢個頭，只不過佢覺得安素態度衰衰咁，先至特登詐死，等佢俾球證趕出場。
坦白講，我求大俠就好佩服李華度嘅勇氣，事關佢夠膽做又夠膽認；但另一方面就覺得佢咁做好儍，原因係國際足協啱啱開始查呢單嘢，重話考慮罰佢停賽㖭。
本身係「3R」成員之一嘅李華度，如果因為咁而喺之後被罰停賽，影響到巴西嘅成績，睇怕佢第日番到巴西，都唔使旨意有好日子過。
尼日利亞前鋒阿加浩華打空翻叻就係人都知，原來佢哋國家體操隊以前真係斟過佢，但佢就選擇咗踢足球。唔係我求大俠睇唔起尼日利亞啲體操，但係足球肯定係佢哋強項之一，所以阿加浩華點解揀足球唔揀體操，大家心照啦！
喺今日對德國嘅愛爾蘭，講明話唔再講堅尼被逐單嘢，但德國教練禾拉就無端端將件事挖番出嚟，重話愛爾蘭領隊麥卡菲做得好啱。係人都知德國佬最叻出口術，禾拉喺賽前挑番起對方嘅傷心事，擺明係想擾亂愛爾蘭嘅軍心。
英格蘭領隊艾歷臣日前鬧自己班球員冇品，喺對完瑞典場波，淨係得龍門施文向觀眾拍掌多謝，其他就一啲表示都冇。其實我求大俠都覺得艾歷臣鬧得啱，事關如果冇球迷支持，班球員邊度有咁豐衣足食呀！
噚日中國對哥斯達黎加場波開賽之前，見到班國足咁齊心唱國歌，我求大俠真係有感動，畢竟代表國家。