美股周一大跌，杜指及納指分別下挫2.2%及3.3%，技術上，杜指跌穿9800，將下試9600，納指則再創今年新低，有機會再考驗去年9月低位1400水平。雖然美股相當超賣，短期唔排除會有反彈，但整體形勢則向淡。
過去兩個月，資金流出美股嘅迹象明顯，而美股對港股嘅影響力亦下降，其實呢個發展趨勢係好事，對港股有利。
港股噚日初段最多跌過155點，低見11204，其後逐步收復失地，抽回11312收市，僅跌47點。技術上，恒指呢幾日喺50日線（現處11302）附近爭持，如果呢兩日守穩11200，將再挑戰第1度阻力11400，但估計破關機會唔太大，進取嘅讀者，可伺機在11400附近買恒指Put輪9049，恒指回頭跌至11200若唔穿，可先沽貨獲利。
趙飛雲今個月想專心睇世界盃，所以暫時唔會炒上落，會等候恒指跌近11000水平先買貨，買入後以10800作為止蝕計數位。
中國隊首戰輸波唔算太意外，但整體表現則略為失望，希望對巴西及土耳其會有更佳表現，唔使13億中國人再「唉」多幾聲。
趙飛雲