由蔡少芬（Ada)、郭羨妮、馬浚偉（馬仔）同陳豪主演嘅電視劇《洛神》，將會喺呢個月二十四號播出。
故事講述Ada同馬仔飾演嘅曹植以及陳豪飾演嘅曹丕，發展一段三角戀，不過Ada最後同陳豪結婚。另外，Ada同郭羨妮呢兩位無綫當家花旦，亦會展開一場大鬥法。劇中佢哋原本係金蘭姊妹，但後來郭羨妮唔抵得Ada咁多人鍾意同咁幸福，所以加害Ada，後嚟郭羨妮重用計仔害死Ada。
馮仁昭同呢套劇嘅監製梅小青傾開偈，佢大讚Ada同郭羨妮演技大有進步，話佢哋有場嗌交戲做得不知幾咁精采。至於陳豪，小青姐亦相信佢可以憑呢套劇成為新一代師奶殺手。雖然有好多場戲拍完之後要再拍過，但小青姐話為令套劇更完美，所以都冇計！
日前台灣有消息指拍緊《還珠格格三》嘅古巨基拍攝騎馬戲份時，唔小心跌至重傷。𠵱家身處北京大觀園拍戲嘅基仔，知道呢個消息都覺得莫名其妙。基仔嘅經理人重即刻鄭重咁澄清絕對冇咁嘅事，因為怕基仔嘅父母擔心。而忽然傳出不利嘅謠言，令人懷疑可能係一班《還》劇嘅忠實影迷，接受唔到由基仔嚟做「五阿哥」一角而中傷佢。
無綫世界盃主持黃安琪，早幾日先至俾人傳佢情挑中國主將范志毅，噚日佢喺韓國竟然又自己買票去捧范志毅場，唔通佢唔怕畀人講閒話？馮仁昭噚晚同黃安琪傾長途電話嘅時候，佢話：「我係佢fans，見中國隊嗰場波重有飛賣，咪走去捧佢場囉，睇到我好肉緊，雖然中國隊輸咗波，但我未覺得失望，因為嚟緊重有兩場踢㗎嘛。」
饒林紅噚日去跑馬地出席「香港賽馬會冠軍人馬頒獎典禮」記者會，饒林紅更特別佩戴由日益珠寶贊助嘅紅寶首飾到場，總值四十五萬。問佢有冇保鑣護送？饒林紅話：「冇呀！所以都好驚，我噚日已經攞咗啲首飾，之後重同朋友食飯，如果唔見咗都唔知點賠。」
舒淇上年接拍咗法國導演洛比桑監製嘅電影《TheTransporter》，而呢套戲係舒淇第一部進軍國際嘅電影，重已經安排咗今年九月二十三日喺美國及十月二十三日喺法國上映，到時舒淇會親自到歐美等地宣傳。其實舒淇非常重視呢套戲，佢重花咗唔少工夫苦練英語，希望憑住呢套戲幫佢開拓國際市場。
蘇永康同老友梁漢文噚日喺山頂凌霄閣，接受由台灣名嘴陶晶瑩主持嘅台灣節目《亞洲娛樂中心》訪問。世界盃日前開鑼，中國隊噚日輸咗畀哥斯達黎加，康仔噚日竟然話：「我冇睇波，我重覺得好似愁雲慘霧，但都替中國隊開心嘅，初登世界舞台，但希望世界盃快啲過啦。」