前輩賓架「師傅H」請教授食飯，搵左丁山做陪客。師傅H退休幾年，靜享清福，每年去外地遊覽幾次，在港時間除咗同老友賓架吃飯之外，就係做一啲佢以前冇時間做嘅事──參加種種文娛活動，喺大會堂、文化中心最易碰到佢，最近重去睇埋香港話劇團嘅全球首演──《如夢之夢》（台灣賴聲川編劇，足本七小時），真係服咗佢嘅雅興。
聽講賴聲川好感謝香港話劇團夠膽夠魄力將佢嘅嘔心瀝血傑作搬上舞台，佢認為除咗香港有如此組織力之外，大陸台灣嘅話劇界暫時都冇法子足本上演《如夢之夢》。呢套話劇嘅賣座，由頭爆到尾場，可見香港還有不少知音人，師傅H係其中之一。
師傅H閱歷豐富，佢話有啲人講昔日「塘西風月」，唔多真確，肯定係三手資料。左丁山陰陰地笑：「你都唔係好老啫，一九三○年之前，你幾多歲呀？」師傅H話：「細路唔好嘴尖尖，我未入學，阿爺就帶我去塘西，阿爺玩乜食乜我唔知，我哋啲𡃁仔就有一個偏廳食花生糖、糖水，等阿爺出嚟，自細就聽唔少嘢！」
原來七十幾年前，香港咁開放，如果今日重有塘西，可能有幾百個狗仔隊喺區內猛影相，周刊八卦專欄主力寫手唔怕個個禮拜搜索枯腸，冇料落鑊。
不過嚴格嚟講，師傅H尚未算親歷塘西韻事，要搵個九十歲以上嘅世家後人先至會有一手資料。