中國隊對哥斯達黎加將投資者焦點吸引到世界盃球場上，港股成交進一步萎縮至不足52億元。世界盃要踢足1個月，港交所（388）真係多得佢唔少。
中國對住哥斯達黎加都要連吞兩蛋，就更加令人失望。世界盃咁多人捧場，唔知可唔可以捧有線寬頻（1097）呢？此股噚日冇起跌，但黑客就話絕對買得過，因為電視廣播（511）基本上已放棄收費電視業務，有線可以獨大。
健諾國際（8031）上市第二日就被人拋售至不似股形，收報0.40元，大挫28.6%，成交達3451萬元，完全唔似係壓價收集喎。阿虎噚日聽到有間證券行為咗要做乾淨盤數而迫孖展客轉倉，加上此股上市首日表現唔好，孖展客索性連倉都唔轉，趁大市重有成交，直接沽貨計數。健諾股價咁嘅表現，簡直令捧場客斷腸，佢做幾多條人造腸都補唔番捧場客嘅損失。
和記港陸（715）成交亦開始萎縮，但當然與世界盃無關。ｅ莉莎話，據聞幕後人士開始無以為繼，要沽就要趁手，噚日重有4824萬元成交，遲啲就好難講。此股早前傳出和黃（013）會注資，但一直只聞樓梯響，其實和記港陸早前已表明和黃唔會向公司注資。
新確（1063）由3月底0.25元炒上嚟，噚日收報0.72元，累積升幅已達1.8倍。據聞此股可能會同四川托普進一步合作，可能涉及配股，後市應該重有得上。
阿虎