今次真係走慢啲都唔掂！小初完全估唔到「泰哥」呢隻健諾（8031）表現咁難睇。
想當日小初因為入「大飛」但分得少而叫唔抵，家陣睇返轉頭，簡直要感謝祖先保佑，先至輸得咁少。
健諾招股價65仙，小初有幸分到啲，上市第一日，開初最高見過69仙，之後就有沽盤殺到，但與此同時，小初又見到大量買盤接貨，所以重以為莊家玩壓價收貨，所以點都唔肯沽。
噚日朝早，健諾沽盤仍然繼續湧現，小初發覺勢色唔妥，急急喺50仙樓下沽出，結果全日大跌28.6%，收40仙，睇嚟今次真係屍橫遍野。
經紀陳對於健諾表現咁差都覺得莫名其妙，佢話睇番配股分布嘅通告，明明貨源集中喺少數人手上，就算有舊股可以沽得，都冇理由有咁大沽壓，除非有人要貨嘅價錢同其他人有別，咁就難講。
總之小初玩健諾呢鋪，係近期最瘀之作，真係要返屋企反省一下。
慕容小初