計埋今日葡萄牙對美國及俄羅斯對突尼西亞兩場波，今屆賽事到𠵱家已經打咗一輪，當中發現到一啲「估波玄機」，值得同大家分享一下。
有冇發覺呢個世界盃啲亞洲盤結果好似有路捉咁，講緊嘅係佢哋臨開波前嘅讓球盤變化。幾乎所有臨場出現「落飛」情況嘅盤口，結果都可以順利開出，好似揭幕戰嘅塞內加爾下盤、喀麥隆對愛爾蘭嘅下盤、意大利喺賽前由一直企硬嘅讓一球/球半高水，突然「打飛」打到去意大利讓球半，重要得番九折，最後都係趕到上車嘅盤，順利直達終點。
呢樣嘢可以咁正路有得睇，係有別於平時聯賽或者盃賽嘅情況，總結係喺呢段期間不妨多留意臨場盤口，有「飛」嘅盤多數有計。
另外，最近嗰啲熱門波膽都好旺吓，暫時大部份賽事嘅賽果都好正路，好似英格蘭打和瑞典一比一、意大利淨勝厄瓜多爾二比○、巴西喺世盃首戰淨勝土耳其一球等等，呢啲賽果都好鬼「老正」。
事實上，世界盃又唔似得聯賽或者盃賽咁，每一隊都唔會有太多顧慮因素而有保留，賽果正路實在唔出奇；最緊要我哋估波嗰陣唔好諗得咁複雜，純粹睇表面就已經可以有好高命中率。
建議第二輪分組賽，甚至今日嘅兩場首輪賽事，都可以多敲呢啲只有約七倍左右嘅大熱波膽，或者參考吓近屆賽事同樣階段嘅戰果。 文：華度