近一個禮拜樓市轉靜，地產代理都重有啲一手貨尾同二手做吓，但測量師行就靜得好緊要，甚至連以前好旺嘅銀主盤，𠵱家都少咗成交，只有百萬元以下嘅細價貨先至有人吼。
噚日世界盃賽事，中國對哥斯達黎加，由於全港矚目，好多公司都明知生意淡靜，中原營業董事陳永傑就揀噚日帶同一班topsales去打野戰，好過大家做唔到生意坐喺度。出發點係好，但唔知啲下屬是否認同。
今年以來，樓價平穩，但租金就有較大嘅跌幅，相對去年同期，大屋邨租金跌咗一成到一成半，唔少屋苑全包呎租十零蚊有交易，月租萬元以下大把選擇。不過，假如想再慳啲，不妨考慮唐樓，因為租金跌幅重大，達到兩成。
商廈租金仍然不振，卓先地產代理上環嘅永樂街235商業中心，業主提供天花、地氈同分體冷氣，重送三個月管理費，每呎6.5元起。該廈單位557至1364方呎。
蘭西