有傳劉德華和天幕另一股東、以中建電訊名義入股的麥紹棠出現意見分歧，華仔更表示有人去信多間公司着對方不要找他工作，此舉令他不能接受。華仔更打算於日內發律師信，向自己做大股東的天幕電影公司追討欠薪。
天幕電影公司兩位股東劉德華和以中建電訊名義入股的麥紹棠，合作之初關係密切，但去年開始雙方合作出現分歧。早前華仔想以天幕名義入股杜琪峰為首的銀河影業，亦因與麥紹棠合作出現問題受到拖延，最近更有人以天幕股東的名義，去信幾間公司包括中國星、星藝影畫和公益金等，知會對方暫時不要找華仔合作。
昨日記者致電華仔，問他與麥紹棠的關係，華仔說：「唔係吖，我哋關係好好吖，合作都好開心。不過，我日內會發律師信向天幕追討欠薪，因為天幕爭我錢。」那豈不是自己告自己？華仔說：「係吖，不過我今次係以藝人身份向公司追討欠薪。」據知華仔持有天幕百分之五十一的股份，而以麥紹棠為首的中建電訊則持有百分之四十九。
華仔承認有人向其他公司發信着對方不要找他工作，華仔說：「令到我最唔開心嘅，係有人話唔准搵我做慈善嘅工作，呢樣嘢我真係唔可以接受，發生咁嘅事會影響我同其他公司嘅合作，所以我惟有透過律師去解決同埋澄清件事。」
中國星老闆娘向太亦承認收過此類信件，她說：「日前公司係收過咁嘅信，嗰邊係以天幕股東名義發出嘅，但詳情我都要進一步了解吓，睇吓究竟發生咗咩事。」
昨日麥紹棠透過其公關公司的徐小姐回應說：「麥生承認有發過信畀四間公司，但內容涉及商業秘密，唔可以透露，但麥生話肯定冇講過唔畀劉德華做任何有關慈善嘅嘢。」