日本幾個主要電視，包括NHK及TBS等為咗迎接世界盃，推出不少足球節目，早上先教市民認識足球，下午同晚上就直播日本同部份南韓賽區比賽；之後就有精華，有電視台重搵埋前南斯拉夫隊長史杜高域上去做嘉賓講波。
喺日本同香港都大熱的PS2足球遊戲winningeleven6，推出個多月，食住世界盃嘅熱潮，已經賣出超過六十八萬五千隻遊戲，破晒同時期賣出最多足球電視遊戲紀錄；而開發呢個遊戲嘅KONAMI，希望呢個遊戲可以賣到一百五十萬隻。
前晚英格蘭對瑞典場波，場外好多冇飛嘅球迷希望可以最後一刻搵到票入場，不過場內所見，三樓高層原來有唔少空位，到底啲波飛去咗邊呢？真係唔明，係咪球迷買咗飛冇去？抑或係其他原因呢，希望國際足協搵到答案啦！