港股6月份首個交易日，總算有個好開始，恒指在滙豐（005）帶動下，升57點，收11359。
寶源投資睇好滙豐及恒生（011）前景，股價未來半年會有10-12%上升空間，刺激兩股造好。地產股亦見回升，不過長實（001）逆市下跌1.25元，收71元。長實上周出現巨額沽空成交，噚日股價下跌，反映好淡已開始角力。長實50日線（現處72.20元）再度失守，如果連平行上升通道底70.50元亦失守，則確認淡勢，將拖累恒指。
長實逆市下跌，恒指噚日升至第1個阻力位11400已經無力再上，長實能否守穩70.50元回升，對港股能否持續反彈關係重大。市況目前尚未明朗，趙飛雲繼續掛免戰牌，一於全情投入世界盃。
今日係大日子，中國世界盃首戰，迎擊哥斯達黎加。睇過一集《龍珠》，裏面講可以收集人嘅念力化成力量擊敗敵人，如果係真嘅話，13億中國人嘅念力相信可以無堅不摧，為中國隊敲起勝鼓。趙飛雲後生時亦鍾意鬥波，覺得踢波其實同打功夫差唔多，係講一膽、二力、三功夫。技術唔夠，可以用鬥志同體力搭夠與強隊周旋，就算唔贏亦唔會輸得難睇。
趙飛雲