世界盃開鑼，港股成交即縮，噚日只得62.5億元，市情沉悶，令人發慌。噚日場波──墨西哥對克羅地亞，戲碼唔算強，今日中國對哥斯達黎加，睇波嘅人肯定重多，成交都幾難會有起色。
大市在115點的狹窄範圍內上落，出現跌後反彈，恒指收報11359，升57點。藍籌股喘穩，但股仔就走晒樣。大市雖升，但唔計窩輪上升股不足200隻，而下跌股則近350隻，市場氣氛麻麻。
短期大市可升可跌，但中期則睇好，短炒難度高，中線則係部署吸納質優股之時，期望持有半年，可獲利4至5成。上月8日，本欄推介中國製藥（1093），當時股價1.25元，短線目標1.5元，半年目標2.1元。上月底，中國製藥曾升上1.54元，短線目標已實現，之後股價調整，噚日收1.35元，跌8仙，又係「上車」之時，若能在1.3至1.35元吸入最佳，年底目標仍係2.1元。集團去年業績佳，今年又有擴展計劃，且業績亦有理想表現，有條件支持股價進一步上升。
2001年度（12月止），集團營業額11.1億元，增長17%，盈利1.4億元，更大增74%，每股盈利11仙，毛利率持續改善。
中國製藥上月底股東會，通過以2.03億元向母公司收購成品藥製造業務，包括生產線及廠房，全數以作價0.93元發行新股支付。收購完成後，集團的產品組合更趨多元化，由原料藥擴展至製劑產品，料日後可帶來可觀收益。
今年首季，集團整體銷售再上升19%，其中以7-ACA系列產品升80%，維生素C升30%，以及下游產品頭孢菌素由1種增至3種，銷售額更增加1.8倍。集團開發的新藥丁苯酞已完成3期臨床工作，估計下季可投產，帶來盈利新來源。
現年度，估計集團盈利可上升至1.8億元，每股盈利加權計12.8仙，預測PE15倍，股價已可見2.0元。
郭兆誠