我求大俠前日喺日本睇英格蘭對瑞典場波，諗住一睹「萬人迷」碧咸復出後首仗嘅風采，點知喺半場時竟然俾我撞到嚟自加拿大嘅達拉斯小馬球星尼殊。
當時除咗我求大俠外，似乎其他球迷都唔知呢位NBA明星後衞係乜水。我求大俠當然把握呢個千載難逢嘅機會，捉住佢傾個不停。原來小馬上個月尾剛喺西岸準決賽輸咗畀帝王，無緣打決賽，所以尼殊就決定同班friend專程飛嚟日本捧英格蘭場兼解吓悶。
佢重話我知佢老竇阿John原來當年同熱刺領隊荷杜個老竇Derek，一齊喺英國踢波搵食，所以佢全家都係熱刺嘅超級擁躉；英格蘭亦自然係佢嘅至愛球隊喇。
丹麥喺贏咗烏拉圭之後嗰日點慶祝？原來去咗釣魚。佢哋嘅教練M奧臣話釣魚唔單止可以陶冶性情，又可以考驗球員嘅耐性，佢重話一個鍾意釣魚嘅球員，應付久攻不入嘅情況都醒啲喎！咁都得？
塞內加爾中場法迪加偷金鏈嘅事，原來係言語唔通嘅誤會，佢已經將金鏈畀番嗰間南韓店舖，而店舖嘅sales對於累法迪加俾警察盤問，好過意唔去，重喺揭幕戰前送咗個豬仔金牌畀法迪加，祝佢好運，而塞內加爾咁就贏咗法國，真係咁靈？
巴西網球手古爾頓喺今屆法國公開賽雖然輸波，但我求大俠認為佢一啲都唔會失望。事關佢話過如果巴西喺世界盃有比賽，佢希望可以喺電視機前支持祖國；家吓佢唔使比賽，咪可以慢慢睇囉。唔通佢為咗睇波，特登輸波？
前晚睇西班牙對斯洛文尼亞場波，唔知西班牙教練金馬曹係咪緊張得滯，見到佢兩邊胳肋底濕到揸得出水，望落真係覺得有啲核突。好心金馬曹明知道自己大汗，就着件白色恤衫，起碼濕咗都冇咁現呀嗎！
到目前為止，今屆世界盃嘅球證都吹得唔錯，惟獨個南韓球證金榮在就差啲。事關喺噚日巴西對土耳其場波，李華度喺完場前擺明詐死，重要佢自已喺賽後都認係詐死，但係金榮在又俾佢呃到，將安素趕出場，搞到土耳其喺下場對哥斯達黎加，冇咗兩個後防主力。