偉大嘅中國今日正式出戰首場世界盃決賽周賽事，「馬交」嗰邊就隆重其事地，推出咗一啲綽頭十足嘅「中國隊特別盤口」，當中又有冇邊啲係值得玩吓嘅「筍盤」呢？另外，今屆賽事有個波膽仍然係盲門，呢個波膽相信今日亦係時候出現喇！
所謂嘅「中國隊特別盤口」，包括估中國隊可以喺決賽周入到幾多球，同埋喺小組入面可以搶到幾多分？
先講入到幾多球，實際啲去諗係咪應該由零球開始敲起呢？以中國隊嘅近況嚟睇（最近三場友賽，包括對恩浩雲都未入一球），「○入球」唔係無可能㗎，呢瓣個賠率亦係最熱嘅二點五倍，我就認為呢個賠率熱得來唔係太抵。
事實上，中國隊嘅制空能力，隨時係小組四隊中最佳嘅，只要佢哋一博到死球就已經叫胡，呢個「○入球」隨時有爆煲危機。而「入一球」亦都只係得二點六倍，如果要博，我就會揀「入兩球」同埋「入三球」呢兩瓣喇。
至於中國隊有冇機會喺分組賽中搶到分數？同樣地「○分」及「一分」兩瓣都係唔過三倍，又係唔化算。因為你咁有信心中國隊成績真係咁差嘅，淨估佢哋下盤，個回報都唔止得兩倍多啲啦！我信米路功力夠令中國隊出線，就估佢哋拎到「兩分」至「四分」。
今日已經踢到第十二場賽事，○比○呢個波膽竟然重未出現過！睇番近屆都好少呢個情況，而今日三場對賽球隊實力都唔算太懸殊，大家都唔想喺第一場失分，睇來呢個波膽有計「悶」出來了！ 文：華度