香港國際機場噚日又獲國際航空運輸協會頒發金鷹獎，表揚其服務「物有所值」。唔講唔知，新機場由去年一月起為飛機着陸費及停泊費優惠，令航空公司節省咗成二千萬美元，即約一億五千六百萬港元，唔怪得獲獎。
又今年協會嘅第五十八屆年會，首次喺中國舉行，地點在上海，東方航空董事長葉毅幹當主席，好不威風。機管局行政總監彭定中雖然因細佬遭不幸心情欠佳，但對獲獎仍表歡迎。今年一共有十四個機構獲金鷹獎，評審委員會推許四大機場，除香港外，其餘三個係新加坡樟宜、美國夏威夷州及塞浦路斯，香港又真係值得驕傲。
另外，八方聽聞，無綫準備六月中開個新劇集，叫做《衝上雲霄》，以新機場及航空業為背景取材，男女主角分別係吳鎮宇同陳慧珊，梗係講吓機師及空姐嘅古仔啦。佢哋日日喺機場同飛機上見盡人生百態，悲歡離合，連接生都要識，一定有內容。機管局話佢哋好支持本地電影電視，所以只要唔好影響運作，都一定借地方。
傳真︰2623-9278
電郵︰