早前外國有消息傳出，謂歐寶廠方正有意利用新版Corsa小車作設計平台，推出一款全新嘅MPV；而最近就有消息指出，話呢款新車有機會響明年（2003年）推出，兼且重有頗大機會定名為Meriva㖭！
從圖中可以見到，呢款全新嘅MPV，不但外形與新版Corsa一樣，來得趣致可愛之餘，炯炯有神嘅頭燈襯以闊大鬼面罩組合，亦能令賣相變得更吸引，而一組直立式尾燈配搭，亦可給予尾隨駕駛者有明確提示。至於車廂布局方面，雖然車長只有4068mm，較同廠嘅Zafira短約250mm，但仍能為車上乘客營造出闊大嘅車廂空間，設備配搭亦見齊全，用落重好方便㗎。同時，該消息又指出新車嘅機械配搭，將會與新版Corsa相近，當中包括有入門版嘅1.4公升（90匹馬力），同埋頂級版嘅1.8公升引擎（馬力123匹），用以驅動此車可謂綽綽有餘。有興趣嘅車迷，不妨拭目以待喇。