陳雅倫、小雪、姚樂怡、鄭中基、呂方同鄧健泓噚日喺粉嶺聯和墟街市，拍攝新片《粉葛鯪魚赤小豆》。陳雅倫飾演賣魚婆粉葛，鄭中基就扮賣雞嘅雞仔強，呂方係豬肉榮，鄧健泓係茶餐廳夥計，賣胸圍嘅姚樂怡重俾陳雅倫叫佢做大波珍，認真搞笑。
噚日成班演員拍街市戲，陳雅倫之前重特登去街市跟魚販學劏魚，連邊啲魚販會着藍色圍裙，邊啲會着白色圍裙都知。反而鄭中基就唔係好敢捉雞，只係敢捉住隻死雞影相，佢話：「到真係拍時先捉啦，捉雞重可以，劏雞我就唔得啦。」
提到有雜誌話鄭中基買衫𠱁前女友楊千嬅，佢否認其事，不過稍後二人客串拍新劇《百分百感覺》時會有對手戲，鄭中基話唔會尷尬，因為只係拍文戲喎。
另外，小雪最近做咗新一代攝石人，又被傳因打記者而俾唱片公司雪藏，佢噚日全部否認，猛話公司唔會放棄佢喎。至於小雪之前透露話怕鄭裕玲嬲，所以佢同呂方一場咀戲要借位拍攝，呂方噚日聽到之後耍手擰頭話：「佢咁講？借位就唔叫咀戲啦。」
林青霞好耐冇再拍戲，不過最近有一套內地同台灣合作拍嘅劇集《盲女神話》，言之鑿鑿話可以搵到青霞客串做戲中神童嘅啟蒙老師。據講今次可以搵到青霞客串，完全係因為投資套劇嘅人，當年曾經提攜過佢，所以佢答應客串幾場戲，全因為報知遇之恩。
曾經幫林子祥同葉蒨文巡迴登台和唱嘅Sabrina及劉伶樂隊，原來識得演繹五種唔同語言嘅歌，佢哋對雲妮侯斯頓（WhitneyHouston）、CelineDion、Carpenters同ToniBraxton嘅歌都好拿手。佢哋已經開始喺銅鑼灣柏寧酒店嘅音樂地帶度登台，唔做和音做主音。
曾志偉個女曾寶儀同台灣名主持人黃子佼正處於熱戀階段，好多人讚曾寶儀皮膚好，黃子佼就話女友好識得保養，女友重叫埋佢一齊去做面膜，但黃子佼就死都唔肯。黃子佼重自爆早排佢兩個一齊去咗馬爾代夫度假，遲啲重計劃去峇里島，黃子佼話自己同曾寶儀都好容易曬黑，所以到時一定會做好防曬措施。
英皇嘅電影部本來係陳嘉上睇，但𠵱家張承勷入主做咗電影部嘅阿頭，一山不能藏二虎，馮仁昭聽講話佢做得唔係咁開心。最近有一間上市嘅電影公司搵陳嘉上過檔做揸fit人，呢間公司嚟緊會搞好多大製作，重全權畀陳嘉上話晒事，所以相信佢會喺短時間內離開英皇。