西九龍新盤陸續入伙，新供應又源源不絕，為地產代理提供大量生意，所以各行都積極搶灘。中原同美聯兩大代理集團，最近都先後響區內開新分行，而鴻運地產都不甘後人，大角嘴帝柏海灣分行今日就會開幕，一方面做區內嘅二手樓，另一方面用作新盤支援中心，睇嚟西九龍區唔止係發展商嘅戰場，亦都係代理龍爭虎鬥嘅場地。
沙田區住宅以沙田第一城主導，但原來區內較冷門嘅樓盤，吸引力都唔細，好似花園城，最近錄得一宗短炒獲利個案，賺約兩成，都算誇張。
鴻運地產蕭文鴻講，該單位為雅蘭苑中層G室，面積413方呎，原業主響一個月前用65萬買入，最近就成功以77萬賣出。原來花園城因為單位售價響100萬樓下，所以都吸引唔少投資者入市短炒或長線投資。
上海樓市近期好似熱鬧咗，新盤紛紛來港展銷，其中位於河南南路嘅太陽都市花園，發展商搵美聯做銷售代理，今日會公布開售詳情。
蘭西